MAGHEMBE: TANAPA ISIMAMIE HIFADHI KIKAMILIFU

Waziri wa Maliasili na Utalii,Prof JUMANNE MAGHEMBE,amelitaka shirika la hifadhi za Taifa nchini-TANAPA kuhakikisha linahifadhi kikamilifu hifadhi zote zilizopo nchini badala ya kutegemea wafadhili toka nchi rafiki licha ya kuwa baadhi ya hifadhi zinatambulika kuwa ni urithi wa dunia.

Waziri wa Maliasili na Utalii,Prof Jumanne Maghembe

Waziri  MAGHEMBE ametoa agizo hilo wakati akizungumza na Menejimenti ya shirika la hifadhi za Taifa TANAPA pamoja na viongozi wa vyama vya mawakala wa utalii jijini ARUSHA,amesema hifadhi zilizopo nchini ndiyo urithi mkubwa ambao nchi inatakiwa kujivunia hivyo kuna kila sababu ya kuzilinda.

Pia ameiagiza TANAPA pamoja na hifadhi ya NGORONGORO kuchukua hatua za haraka  kuhakikisha wanafanya mazungumzo na huduma za kibenki ili  watalii wanapokuja nchini wanafanya malipo kwa kutumia mitandao kama zinavyofanya nchi zilizoendelea.

Mkurugenzi wa Shirika la hifadhi za Taifa –TANAPA-ALAN KIJAZI,amesema hali ya uhifadhi  wa FARU na TEMBO katika hifadhi ni nzuri licha ya kuwepo kwa changamoto za ujangili.