Hongera Rais Magufuli kwa kasi hii

TANGU aingie madarakani Novemba 25, mwaka huu, Rais John Magufuli amefanya mambo makubwa hasa kwa kutekeleza kwa vitendo ahadi yake na kaulimbiu aliyoitumia katika kipindi cha kampeni ya ‘Hapa Kazi Tu’. Kauli hiyo sasa inayojibainisha kuwa maana yake ni kuwa na Serikali itakayowabijika na kuhakikisha inawaletea maendeleo wananchi, itakayopambana na ufisadi, rushwa na ubadhirifu lakini pia inayomaanisha kuwa Tanzania sasa itakuwa ni taifa la wachapakazi na si vinginevyo.

Imekuwa ni kawaida kwa viongozi wengi wa siasa duniani ikiwemo Tanzania, pale wanapowania nafasi za juu wakihitaji kura za wananchi, hutoa ahadi nyingi lakini matokeo ya utekelezaji wa ahadi hizo, mara nyingi yamekuwa hayafikii kile walichoahidi.

Hata hivyo, hali imekuwa tofauti kwa Magufuli ambaye sasa ni Rais wa Serikali ya awamu ya tano, baada ya kumpokea kijiti, Rais mstaafu Jakaya Kikwete, kwani siku chache tu alipoingia Ikulu alianza kazi kwa kasi iliyoonekana si Tanzania pekee bali duniani kote.

Kiongozi huyo, mbali na kupiga marufuku safari holela za nje kwa maofisa waandamizi wa serikali, alifanya ziara ya ghafla katika ofisi nyeti ya nchi ambayo ni Wizara ya Fedha na kisha akaenda Hospitali ya Taifa ya Muhimbili ambako kote hakuridhishwa na kasi ya utendaji na kuchukua hatua zilizolenga kuboresha utendaji na kuongeza kasi ya uwajibikaji.

Katika Hospitali ya Muhimbili, alilazimika kubadili uongozi kutokana na uozo aliokuta ambao ni pamoja na wananchi kukosa huduma za msingi za tiba, mashine muhimu za vipimo kushindwa kufanyakazi kwa muda mrefu lakini pia hali ya malazi ya wagonjwa kutokuwa ya kuridhisha.

Dk Magufuli hakuishia hapo, kwani mara baada ya kutembelea ofisi hizo nyeti na kubadili hali ya utendaji hasa utolewaji wa huduma, aliamua kuhakikisha anapunguza matumizi yasiyo ya lazima na fedha zinazopatikana kupelekwa katika maeneo muhimu yenye mahitaji.

Katika kutekeleza dhamira yake hiyo, aliagiza fedha zilizokusanywa kwa ajili ya hafla ya kufungua Bunge la 11 takribani Sh milioni 250 sehemu kubwa ya fedha hizo itumike katika kununulia vitanda vya wagonjwa Hospitali ya Muhimbili na kiasi kidogo kilichobaki, ndio kitumike kufanyia hafla hiyo.

Mwishoni mwa wiki, baada ya kuchaguliwa kwa Waziri Mkuu Kassim Majaliwa, kiongozi huyo naye kwa kasi aliyonayo, Rais Magufuli alifanya ziara ya ghafla katika bandari ya Dar es Salaam na kukuta madudu yaliyosababisha kusimamishwa kazi kwa Kamishna Mkuu wa Mamlaka ya Mapato Tanzania (TRA) Rished Bade.

Pamoja na Bade pia walisimamishwa kazi wafanyakazi wengine watano wa mamlaka hiyo na Mamlaka ya Bandari (TPA) kwa tuhuma za uzembe, ufisadi na rushwa.

Mwingine aliyesimamishwa ni Kamishna wa Kodi na Forodha, Tiagi Masamaki. Baadhi ya maofisa hao bado wanashikiliwa na Polisi kwa mahojiano zaidi. Ukweli ni kwamba kwa kasi hiyo, ya Dk Magufuli na uongozi wake, ni wazi kuwa Watanzania sasa wanatarajia kuona ufanisi mzuri kutoka kwa watendaji wa Serikali yao, ikiwa ni pamoja na kupata huduma bora ambazo hapo awali zilishindikana kutokana na uhaba wa fedha.

Naamini kuwa huo bado ni mwanzo wa utendaji wa Serikali hiyo, kwani bado zipo idara nyeti zinazohitaji kukaguliwa kwa jicho la tatu kama ilivyofanyika Muhimbili, Hazina na TRA ambako pia madudu yatafichuliwa bila shaka na hivyo, kuondokana na watendaji wanaoendekeza kujinufaisha wenyewe.

Ni wazi kuwa, kasi hiyo ya Dk Magufuli imeamsha ari kwa wananchi na kuwazindua wavivu, wategaji, wabinafsi, mafisadi na wala rushwa ambao sasa watafanyakazi kwa ajili ya kunufaisha taifa na si matumbo yao.

Ni wazi kuwa Watanzania wanatakiwa kuendelea kumuombea kiongozi huyo na menejimenti yake yote, ili azidi kufanyakazi kwa bidiii kwa manufaa ya Watanzania kama alivyosema mwenyewe kuwa, kwa sasa anahitaji maombi kwa kuwa kazi ya kutumbua majipu si ndogo.