Vyombo vya habari nchini vyapongezwa

VYOMBO vya habari nchini vimepongezwa kwa kazi kubwa vilivyofanya ya kutoa taarifa kwa wananchi wakati wa Uchaguzi Mkuu uliofanyika mwishoni mwa mwezi uliopita.

Pongezi hizo zimetolewa jana na Katibu Mkuu wa Wizara ya Habari, Vijana, Utamaduni na Michezo, Profesa Elisante ole Gabriel wakati akizungumza na Menejimenti ya wizara na taasisi zake kwenye kikao cha kazi kilichofanyika jijini Dar es Salaam.

Profesa Ole Gabriel alisema katika kipindi cha uchaguzi, vyombo vya habari vilifanya kazi kubwa ya kuwahabarisha wananchi kwa kuzingatia weledi wa taaluma yao na hivyo kuwawezesha wananchi kujua mambo mbalimbali yaliyokuwa yakiendelea nchini.

Katibu Mkuu huyo ambaye hicho kilikuwa ni kikao chake cha kwanza tangu ateuliwe kuwa Katibu Mkuu wa wizara hiyo mwishoni mwa mwezi uliopita, aliahidi kuwatumikia na kuwaheshimu wafanyakazi wa wizara yake huku akisimamia majukumu ya kazi kwa kufuata kanuni, taratibu na sheria za utumishi wa umma.

“Hiki ni kikao chetu cha kujipanga kwa ajili ya kazi, ni vyema tukajipanga huku tukijua matarajio ya Mheshimiwa Rais kwetu ni yapi, wananchi tunaowatumikia wanategemea kupata nini kutoka kwetu na mimi kama Katibu Mkuu natarajia kupata nini kutoka kwenu,” alisema Profesa Ole Gabriel.

Akimkaribisha Katibu Mkuu huyo kuzungumza na viongozi hao, Kaimu Mkurugenzi wa Utawala na Rasilimali watu, Titus Mkapa alisema kikao hicho ni maalumu kwa ajili ya wizara kujadili utekelezaji wa mipango yake kwa kasi.

Wakitoa maoni yao kwa nyakati tofauti, viongozi hao waliiomba Serikali iangalie upya bajeti ya wizara hiyo ambayo ni ndogo ili iongezwe na kuwawezesha kufanya kazi zao kwa ufanisi zaidi.

Kwa upande wake, Kaimu Mkurugenzi Mkuu wa Taasisi ya Sanaa na Utamaduni Bagamoyo (TasuBa), Michael Kadinde alisema chuo hicho kimekuwa kikizalisha ajira kwa wanafunzi wanaosoma hapo mara baada ya kumaliza masomo yao, lakini wanafunzi wengi wanakabiliwa na changamoto ya kutokuwa na ada.