Tuchape kazi bila kusubiri mijeledi ya Rais Magufuli

MOJA ya habari kubwa katika vyombo vya habari nchini juu ya ziara za kushtukiza za Rais wa Awamu ya Tano, Dk John Magufuli, ikiwemo ziara ya Wizara ya Fedha.

Akiwa katika ofisi za wizara hiyo iliyo mdomoni kabisa kwa Ikulu ya Magogoni, Dar es Salaam, Rais huyo aliyeanza kazi rasmi Alhamisi ya wiki iliyopita mara baada ya kuapishwa, alikagua ofisi moja baada ya nyingine, huku akishuhudia baadhi ya viti vikiwa vitupu, bila ya wahusika kuwapo katika ofisi zao.

Alidiriki kuhoji, na kujibiwa baadhi yao wako nje ya ofisi ama kwa kazi maalumu au kupata kifungua kinywa. Kwa ujumla, ziara hiyo iligeuka kuwa gumzo, ikielezwa ameanza kufuatilia kwa vitendo utendaji kazi wa watumishi wa umma na hivyo uamuzi wake kwenda sambamba na kaulimbiu maarufu aliyoibuka nayo wakati wa kampeni zake za kuwania urais kwa tiketi ya CCM, `Hapa Kazi Tu’.

Wapo waliompongeza kwa uthubutu wake wa kutaka kujionea utendaji kazi katika idara, taasisi za serikali na mashirika ya umma kwa ujumla, huku wengine wakibeza, kwa madai kuwa ni `nguvu ya soda’.

Sisi wa HabariLeo Jumapili, tunaungana na waliompongeza Dk Magufuli, kiongozi mwenye historia ya uchapakazi na uadilifu, kwa kuonesha kwa vitendo jinsi anavyokerwa na watumishi wa umma wanaofanya kazi kwa mazoea, wakitumia muda mwingi kufanya mambo yao binafsi badala ya kutimiza majukumu yaliyowaweka ofisini.

Pamoja na pongezi, ni vyema watumishi wa umma na Watanzania kwa ujumla, kila mmoja akajitathmini na kuona ni jinsi gani atatoa mchango wake katika kustawisha maendeleo ya nchi.

Haya anayoyafanya Dk Magufuli kamwe si majukumu yake, bali anachofanya ni kujaribu tu kuwakumbusha watumishi kuwa, kila mmoja atimize majukumu yake kulingana na mahali au ofisi alipo.

Rais ana majukumu mengi mno, hivyo itashangaza kuona watumishi wakilala au kwenda ofisini kusaini daftari la mahudhurio na kisha kuingia mtaani kufanya ujasiriamali na mwisho wanapokea fedha za mshahara bila hata kuifanyia nchi kitu chochote cha maana.

Je, tukimsubiri Rais apite kila sehemu, hata kwenye kuzibua mitaro mitaani kwetu ambako pia kuna mamlaka husika za kusimamia majukumu kama hayo, mwisho tutamlaumu Rais kuwa hajafanya chochote katika kukuza maendeleo na uchumi wa nchi kwa ujumla.

Ifike mahali kila Mtanzania atimize wajibu wake, aliye kwenye utumishi wa umma atimize wajibu wake ili kupunguza kero na foleni na urasimu usio na maana katika ofisi za umma.

Tukifanikiwa kuyafanya haya, kwa maana ya kila mmoja kutimiza wajibu wake, hakika haitatuchukua muda mrefu kabla ya kuona mabadiliko makubwa ya ustawi wa nchi na maendeleo kuanzia hatua ya familia, kata wilaya, mkoa na hata taifa kwa ujumla.

Na hicho ndicho wanachotaka kukiona Watanzania, mabadiliko hasa ya kiuchumi, na si kubadili sura au rangi za bendera za vyama pekee. Ili kulifikia lengo hilo, tuanze kwa kumuunga mkono Dk Magufuli kwa kuchapa kazi kwa vitendo, badala ya kuleta ujanja ujanja na mwisho tuishie kuilaumu serikali kuwa haijafanya lolote.

Kamwe huo hauwezi kuwa uzalendo, bali unafiki na uhaini wa uchumi wa taifa hili. Ahsante Dk Magufuli kwa mwanzo mzuri katika kuwaamsha watumishi, nao sasa wapige kazi bila kuvizia ziara za viongozi ili waonekane ni watu makini katika maeneo ya kazi.