VIJANA WAASWA KUWA WABUNIFU ILI KUJIAJIRI

 

VIJANA wameshauriwa kuwa wabunifu wa miradi mbalimbali na kufikiri njia mbadala za kujipatia kipato ili kuweza kujiajiri na kuepukana na ajira tegemezi.

Mkuu wa Wilaya ya Kinondoni, Paul Makonda aliyasema hayo jana jijini Dar es Salaama wakati wa kuwaaga na kuwakabidhi bendera ya Taifa washindi wa tuzo ya Anzisha iliyoanzishwa na Chuo cha Uongozi Afrika (ALA) cha Afrika Kusini.

“Taifa letu lina changamoto kubwa ya watu kufikiri… na ukipata watu waliobadilisha fikra zao na kuweka mipango yao kwenye utekelezaji hapo ndo penye maendeleo,” alisema na kuongeza: “Vijana wengi kwa sasa wana malalamiko ya ajira na mitaji lakini hata ukitaka kuwapa mitaji hawana mawazo ya biashara, hivyo tunawapongeza vijana hawa kwa hatua waliyofikia ya kuwa miongoni mwa vijana 12 waliochaguliwa kwenda kwenye fainali za tuzo hizo”.

Mapema Mkurugenzi Mtendaji wa Taasisi ya Sekta Binafsi Tanzania(TPSF), Godfrey Simbeye alisema tuzo hiyo ilianzishwa kwa lengo la kuwawezesha wajasiriamali vijana barani Afrika kupanua biashara zao ili kutatua changamoto za kijamii na kiuchumi barani Afrika.

Alisema kwa hapa nchini tuzo hiyo inasimamiwa na TPSF ambayo ina jukumu la kuitangaza na kuwahamasisha vijana wajasiriamali wenye umri wa miaka 15 hadi 22 kuomba kushiriki katika tuzo hizo.