TUNAWATAKA VIJANA MUONESHE UKOMAVU WENU BUNGE LA 11

 

ORODHA ya wabunge katika Bunge la 11 italifanya liwe tofauti na lililopita kutokana na idadi ya wabunge wa vyama vya upinzani kuongezeka, huku vijana nao wakionekana kuwa ni wengi zaidi.

Kwa mujibu wa taarifa ya Tume ya Taifa ya Uchaguzi (NEC) iliyotolewa wiki iliyopita, wabunge wenye umri kati ya miaka 21 na 35 wapo 47, wenye umri kati ya miaka 36 na 50, wapo 112 na walio na umri zaidi ya miaka 51, wapo 91.

Kimsingi vijana ni hazina ya taifa na hivyo wingi wao ndani ya chombo hicho cha kutunga sheria ni jambo jema, kwa sababu litasaidia kuwaandaa kushika madaraka makubwa zaidi katika kuongoza nchi yetu siku zijazo.

Kinadharia, vijana huwa na hulka ya kutaka mabadiliko wakati wote lakini wazee mara nyingi huwa na hofu ya kupokea mabadiliko wakitamani hali iliyopo iendelee. Wakati wazee wamekuwa muhimu wakati wote kutokana na uzoefu wao wa kuona mengi, ongezeko la vijana katika Bunge la 11 ni jambo jema pia kwani watasaidia kuwachangamsha wazee katika kujadili hoja, mintarafu suala zima la mabadiliko chanya.

Hata hivyo, kwa uzoefu wa Bunge lililopita, vijana wana tatizo la mihemko ambayo wakati mwingine huwafanya wajisahau na kutumia lugha zisizo na staha katika kufikisha ujumbe wao.

Kwa utamaduni wa Mwafrika, kijana anatazamiwa kumheshimu mtu aliyemzidi umri, na hata kama ni kumkosoa au kupingana naye anatakiwa afanye hivyo kwa kutumia lugha nzuri, isiyoudhi wala kumkosea adabu mkubwa.

Lakini, kwa bahati mbaya, katika Bunge lililopita tulishuhudia baadhi ya vijana na wazee wachache wakivuka mipaka kwa kutumia muda adhimu wa Bunge kurusha vijembe, lugha zenye ukakasi, kuzomea na hata kuzira na kutoka nje.

Kwa kutumia uzoefu wa Bunge lililopita hofu yetu ni kwamba kuna uwezekano wa mijadala ndani ya Bunge la 11 kutawaliwa na mihemko ya vijana hawa kutaka kuonesha umahiri wao katika siasa hata kama wanachokijadili hakina tija kwa taifa.

Vijana na hata wazee wanaweza pia kuhamashia mchakato wa uchaguzi ambao umekwisha kwenye Bunge, jambo ambalo litazua malumbano yasiyo na tija. Wakati tukiamini kwamba semina elekezi zitaandaliwa kwa ajili ya wabunge wapya kuwafunza kanuni na maadili ya chombo hicho chenye heshima kubwa kwa Watanzania, ni imani yetu kwamba wabunge vijana hawatowaangusha waliowachagua kwa maana ya kugeuza chombo hicho kuwa kijiwe cha lugha zenye ukakasi.

Tunawakumbusha vijana kwamba uwezo watakaouonesha sasa katika kujenga hoja kwa umakini na busara huku wakilinda heshima yao na ya Bunge, ni kitu kitakachowajenga zaidi katika maisha ya kisiasa wanayoyaanza.

Umakini, heshima na busara watakazotumia kujenga hoja bila shaka itakuwa sababu ya kuendelea kuchaguliwa tena katika chaguzi zijazo. Tunaamini pia kwamba Spika atakayechaguliwa atakuwa madhubuti katika kusimamia kanuni na kutoa haki kwa wabunge wote bila upendeleo. Kadhalika tunaamini spika huyo atahakikisha wanaokiuka kanuni za Bunge, wanachukuliwa hatua bila kujali vyama vyao.