Mchakato wa kumwondoa madarakani Rais wa Brazil waendelea

Mchakato wa kumwondoa Rais Dilma Rousseff wa Brazil madarakani unaendelea baada ya kutokea mabishano kati ya viongozi wa baraza la seneti na bunge la Congress ambao wamepinga maamuzi ya Kaimu spika wa bunge.

Rais Dilma Rousseff wa Brazil

Kaimu spika wa bunge la Brazil Waldir Maranhao alibadilisha mchakato wote kwa kusema unapaswa kuanza upya kwani ulikuwa na dosari.

Maranhao amesema mchakato wote ulikuwa na dosari kwani kura ya kwanza ya bunge ilionekana kumhukumu Rousseff na kumnyima haki ya kujitetea.

Baraza la seneti limepinga maamuzi hayo na kusema linatarajiwa kupiga kura katika kikao chake kitakachofanyika kesho (Jumatano) kuanzisha mchakato wa kumfungulia mashtaka Rais Rousseff kwani lengo lao ni kurekebisha maovu.