WANANCHI WATAKIWA KULINDA AMANI YA NCHI - CP CHAGONJA

JESHI la Polisi limewataka wananchi kuendelea na utulivu kama walivyoonyesha wakati wa upigaji kura na hatimaye kupatikana katika siku ya kumwapisha Rais Mteule Dk. John Pombe Magufuli.

Akizungumza na waandishi wa habari jijini Dar es salaam, Kamishna wa Oparesheni na Mafunzo Jeshi la  Polisi, Paul Chagonja amesema kuwa jeshi la polisi limeridhishwa na utulivu uliokuwepo wakati wa upigaji kura, na utulivu huo umeweza kufanya uchaguzi kwenda salama na hatimaye kukaweza kupatikana mshindi.

Amesema katika suala la Zanzibar liko katika mazungumzo na viongozi wanafanya kazi yao hivyo maandamano yaliyopangwa kufanywa na chadema hayana nafasi kwa mujibu wa sheria.

Aidha Chagonja amezungumzia watu waliokamatwa katika vurugu za uchaguzi kuwa kwasasa wamefikishwa mahakamani na huku wengine wakiendelea na uchunguzi.

Amesema hali ya amani ipo na wananchi wametakiwa kulinda hali hiyo na ikitokea mtu analeta uchochezi waripoti kwa vyombo vya usalama ili hatua zichukuliwe.

Chagonja ametaka baadhi ya taarifa katika mitandao ya jamii kuupuzwa, kwani zinatoa taharuki kwa wananchi na zinapotosha.