MAGUFULI APEWA CHETI CHA USHINDI WA URAIS

Mh. Bi. Samia Suluh Hassan na Mh. Dr. John Pombe Magufuli, wakati akipokea cheti cha ushindi wa nafasi ya urais kutoka kwa mwenyekiti wa tume ya uchaguzi Mh. Jaji Lubuva

Mgombea urais kupitia chama cha CCM John Mafuguli amepewa cheti cha ushindi baada ya kutangazwa kuwa mshindi wa uchaguzi wa urais uliofanyika Jumapili.

Bw Magufuli amekabidhiwa cheti hiyo kwenye hafla iliyoandaliwa katika ukumbi wa Diamond Jubilee jijini Dar es Salaam.
Hafla hiyo imehudhuriwa na kiongozi anayeondoka mamlakani Rais Jakaya Kikwete pamoja na waangalizi wa uchaguzi kutoka makundi mbalimbali.
Kadhalika, mgombea wa pekee mwanamke katika kinyang'anyiro hicho Bi Anna Mghwira wa chama cha ACT Wazalendo alihudhuria hafla hiyo, na kumpongeza Bw Magufuli kwa ushindi wake.
Kiongozi huyo mpya hakutoa tamko lolote wakati wa hafla hiyo na alifululiza moja kwa moja hadi ikulu chini ya ulinzi mkali.
Mwenyekiti wa Tume ya Taifa ya Uchaguzi Tanzania Jaji Mstaafu Damian Lubuva alisema Alhamisi kuwa Magufuli, alijipatia kura 8,882,935 ikiwa ni asilimia 58.46.
Mpinzani wake wa karibu Edward Lowassa wa chama cha Chadema alijipatia kura 6,072,848 ikiwa ni asilimia 39.97 ya kura zote halali.
Matokeo hayo yamepingwa na Bw Lowassa na chama chake.
Akiwahutubia wanahabari kabla ya kutangazwa kwa matokeo Bw Lowassa alidai tume imeshirikiana na chama tawala kumpokonya ushindi.
Aliitaka tume hiyo kumtangaza kuwa mshindi.
Lakini tume hiyo imejitetea na kusema mchakato wote ulikuwa huru na wa haki na kwamba uliendeshwa kwa kufuata katiba.
Bw Magufuli, ambaye alikuwa Waziri wa Ujenzi katika serikali ya Rais Kikwete, anatarajiwa kuapishwa kuwa rais katika muda wa siku saba zijazo.

Mgombea wa ACT-Wazalendo, Anna Mghwira (kushoto) akisalimiana na Rais Mteule, John Magufuli

katika tukio hilohilo Mgombea Urais kwa tiketi ya ACT-Wazalendo, Anna Mghwira alipopewa nafasi ya kuzungumza kwaniaba ya wagombea wengine wote alisema kuwa amekubali kushindwa katika kinyang’anyiro cha Uchaguzi Mkuu na amemtaka Rais mteule, Dk. John Magufuli kushughuliki uchumi wa nchi kwa maslahi ya wananchi.

Amezungumza hayo alipokuwa katika sherehe za kukabidhi cheti cha ushindi kwa Mgombea urais wa Chama Cha Mapinduzi (CCM), Dk. John Magufuli kwenye Ukumbi wa Diamond Jublee Jijini Dar es Salaam.

Nghwirwa amemtaka rais huyo mpya kuleta mabadiliko ya uchumi wa nchi kupitia ilani ya chama cha ACT-Wazalendo kwa kuzingatia uzalendo wa kutumia vizuri rasilimali za taifa.

Akimakabidhi ilani ya chama hicho, Mghwira amesema kuwa ilani hiyo ilizingatia usawa wa kijinsia kuwatengeneza benki za wakulima, kuweka miiko ya uongozi kwa kuzingatia uadilifu.

Wagombea wengine waliohudhuria ni Chief Lutalosa Yemba wa ADC, Fahmi Dovutwa wa UPDP, Macmillan Lyimo wa TLP, Janken Kasambala wa RNA. Wasiohudhuria ni Hashimu Rungwe wa Chaumma na Edward Lowassa wa Chadema.

Mratibu wa Taifa wa Muungano wa Watetezi wa Haki za Binadamu, Onesmo Olengurumwa

Aidha pia Asasi mbalimbali za kiraia (AZAKI) zimemtaka Rais Mteule, John Magufuli kuhakikisha analeta Katiba Mpya ili kubadilisha maendeleo ya nchi na kuondoa matatizo mbalimbali yanayotokana na mfumo mbovu wa katiba ya sasa.

Asasi hizo zinazojihusisha na masuala mbalimbali ya kisheria, kijamii, kisiasa na utamaduni zimesema hayo katika mjadala uliofanyika katika ukumbi wa British Council, Dar es Salaam, uliozungumzia mambo ambayo Asasi za kiraia zinategemea kuyaona katika uongozi wa serikali mpya.

Mratibu wa Taifa wa Muungano wa Watetezi wa Haki za Binadamu, Onesmo Olengurumwa amesema serikali mpya ni vyema ikaheshimu haki za binadamu ambazo ni nguzo kubwa katika utawala wa sheria.

“Tunahitaji kuiona Tanzania ikiheshimu haki za binadamu na amri za kikatiba hivyo katiba mpya ndio itakayosimamia misingi yote hiyo katika usawa,” anasema Olengurumwa.

Olengurumwa ambaye ndiye mwanzilishi wa mjadala huo amesema mambo mengine ambayo Asasi za kiraia inatarajia kuona ni mgawanyo mzuri wa kazi kwa viongozi ili kuongeza ufanisi kwa kila uongozi ufanye kazi katika kitengo husika.

Kuwepo kwa kasi ya uwazi na kasi ya uwajibikaji wa serikali Olengurumwa analizungumzia kuwa ni jambo linalowaumiza sana wananchi kutokana na rushwa zinazopitiliza kwa viongozi wasio wawajibikaji.

Ilani hizo za asasi za kiraia zenye ujumla wa ilani nane ambazo nyengine ni pamoja na, usawa wa kijinsia, usimamizi wa maendeleo, kukubalika na kushirikishwa kwa asasi za kiraia pamoja na upatikanaji wa huduma muhimu za kijamii.

Olengurumwa amesema asasi za kiraia ni wadau muhimu sana katika maendeleo ya nchi yeyote wakiwa wanafanyakazi kwa maslahi ya umma na kusema kuwa tunaitaka serikali mpya iangalie asasi hizi na itambue kuwa zinamchangi mkubwa katika maendeleo.