Mawakala wa kuuza wasichana mbaroni

Mawakala wa kuuza wasichana mbaroni

Sakata la biashara ya binadamu ambalo limeibuka kwa kasi nchini limeanza kufanyiwa kazi na serikali baada ya Jeshi la Polisi Kikosi cha Maji kuwatia mbaroni mawakala watano ambao ni wanawake wakituhumiwa kujihusisha na biashara hiyo.

Kamanda wa Polisi wa Kikosi cha Maji, Mboje Kanga, akizungumza na NIPASHE jana kuhusu hatua ambazo zinachukuliwa na jeshi hilo kukabiliana na tatizo hilo, alisema mawakala waliokamatwa ni wakazi wa Zanzibar na kwamba hatua za kisheria zimeanza kuchukuliwa dhidi yao.

Kamanda Kanga ambaye hata hivyo, hakutaja majina ya mawakala hao, alisema walikamatwa kati ya Januari 23 na 24, mwaka huu wakiwa na watoto watano ambao waliwanunua kutoka mikoani.

Alisema watoto ambao ni wanafunzi wa shule za msingi walikamatwa wakitaka kusafirishwa na mawakala hao kwenda Zanzibar, umri wao ni kati ya miaka 14 na 15 na walitoka katika wilaya za mikoa ya Ruvuma, Tabora na Mtwara.

Aliongeza kuwa katika mahojiano na watoto hao walisema walipata ridhaa ya kuchukuliwa na mawakala hao ambao haijafahamika baada ya kusafirishwa kwenda Zanzibar wangepelekwa katika nchi gani.

“Biashara ya binadamu imeshamiri sana nchini, lakini tumejipanga kukabiliana nayo, tutaendelea kuwasaka mawakala wengine zaidi wanaojihusisha na biashara hiyo,” alisema Kamanda Kanga.

Uchunguzi uliofanywa na NIPASHE, umebaini kuwa biashara hiyo iliibuka kuanzia Desemba mwaka jana na kushika kasi Januari mwaka huu na wanaosafirishwa wengi ni watoto wa kike kutoka mikoa mbalimbali nchini. Wapo wachache wa kiume pia.

Uchunguzi huo ulibaini kuwa mikoa ambayo watoto hao wananunuliwa na mawakala kabla ya kusafirishwa kupelekwa nchi za Uarabuni kufanya kazi mbalimbali zikiwamo za ndani ni Mtwara, Lindi, Manyara, Pwani, Tabora, Ruvuma, Tanga na Shinyanga.

Jana gazeti hili liliandika habari kubwa ikielezea jinsi watoto hao wanavyosafirishwa kwenda kutumikishwa na maeneo wanayotoka.

Watoto hao ambao NIPASHE iliwagundua, kuwaona na kuzungumza na baadhi yao lakini majina yao tuliyasitiri kwa sababu za kimaadili wana umri wa miaka 14 na 15 wote kutoka kijiji cha Nakapanya wilaya ya Tunduru mkoani Ruvuma; mmoja mwenye umri wa miaka minane anatoka mkoa wa Tabora; wakati mwingine wa kiume mwenye umri wa  miaka 15 anatoka kijiji cha Mkangula mkoa wa Mtwara, ilhali  mwenzake kutoka kijiji cha  Mbembaleo mkoani Mtwara ana umri wa miaka 14.

Pia NIPASHE iliripoti kuwa Januari 25, mwaka huu watoto waliokamatwa bandarini wakitaka kusafiri kwenda Zanzibar ni binti mwenye umri wa miaka 13 kutoka kijiji cha Manoro wilaya ya Lushoto mkoa wa Tanga; mvulana mwenye umri wa miaka 13 kutoka wilaya ya Tunduru mkoani Ruvuma na binti mwenye umri wa miaka 12 kutoka Tunduru Mjini.

Wengine ni binti mwenye umri wa miaka 14 kutoka kijiji cha Namalumbusi wilaya ya Masasi mkoa wa Mtwara, mvulana mwenye umri wa miaka 12 kutoka mkoa wa Manyara na mvulana mwingine mwenye umri wa miaka 10 kutoka wilaya ya Nachingwea mkoa wa Lindi.

Watoto waliokamatwa Januari 26, mwaka huu ni binti mwenye umri wa miaka 12 kutoka kijiji cha Ndanda mkoa wa Mtwara; binti mwenye umri wa miaka 13 kutoka kijiji cha Mteruka wilayani Nachingwea mkoa wa Lindi na mwingine mwenye umri wa miaka 13 kutoka kijiji cha Mnazi Mmoja mkoa wa Mtwara.

Wengine ni binti (13) kutoka kijiji cha Mnazi Mmoja mkoani Mtwara, binti (14) kutoka mkoa wa Manyara na binti (17) ambaye ni mwanafunzi wa kidato cha tatu kutoka kijiji cha Kokoro wilayani Kishapu mkoa wa Shinyanga.

Januari 27, mwaka huu alikamatwa binti (14) mkazi wa Manispaa ya Iringa mkoani Iringa.

Taarifa kutoka ndani ya Kituo cha Kikosi cha Polisi Maji, zinaeleza kuwa watoto hao wakishakamatwa na kuzuiwa kusafiri, wamekuwa wakichukuliwa maelezo na baadaye kuachiwa warejee walikotoka, lakini wengine hushindwa kurejea kutokana na kukosa nauli hivyo mawakala kupanga njama za kuwasafirisha kinyemela.

Taarifa zinaonyesha kuwa mawakala hao wakishafanikiwa kuwapata watoto hao kutoka katika mikoa hiyo huwapeleka jijini Dar es Salaam na baadaye kusafirishwa kwa usafiri wa majini kutoka Bandari ya Dar es Salaam kwenda Zanzibar.

Imebainika kuwa watoto hao wakifikishwa Zanzibar hukutana na watu maalum ambao huwapokea na kufawanyia mipango ya kuwasafirisha kwa usafiri wa ndege au wa majini kwenda Uarabuni ambako hutumikishwa kazi mbalimbali.

Mawakala hao wakishafanikiwa kuwasafirisha kutoka Bandari ya Dar es Salaam hulipwa wastani wa Dola za Marekani 5,000 (Sh. milioni 8) kwa kila mtoto wanayefanikisha kumvusha kutoka Tanzania Bara kwenda Zanzibar.

Kwa mujibu wa uchunguzi huo, ili kuhalalisha safari za kuwasafirisha watoto hao, mawakala hula njama na baadhi ya wenyeviti wa serikali za mitaa kwa kuandika barua zinazoelezea sababu za watoto hao kwenda Zanzibar.

Wastani wa watoto kati ya watano hadi 10 hufika katika Bandari ya Dar es Salaam kwa ajili ya kusafiri kwenda Zanzibar kila siku.

Uchunguzi  huru wa NIPASHE umebaini kuwa Januari 23, mwaka huu waliwatilia shaka na polisi na kuzuiwa kusafiri ni watoto wanne ambao walifunguliwa jalada la upelelezi kituo cha Polisi Maji ambazo ni MUD/RB/40/2013 na MUD/RB/36/2013.