UNBOUNDARIES NEWS

Dawa za binadamu za Sh 2 bilioni zateketea

Wafanyakazi wa Kampuni ya Dawa sherys  wakisaidiana na Kikosi cha Zimamoto na Uokoaji Cha Halmashauri ya jijini la Dar es salaama kuzima moto Uliotokea kwenye Gara la kuifadhia Dawa za Panya eneo la Mwenge jana. Picha na Juliana Malondo 

Na Bakari Kiango, Mwananchi  (email the author)

“Moto huu umeteketeza kila kitu kilichomo humu ndani na kuna dawa zingine zimekuja jana tu hapa,”

Dar es Salaam. Vifaa tiba na dawa za binadamu zenye thamani ya zaidi ya Sh2 bilioni  vimeteketea kwa moto katika bohari ya Pyramid Pharma ambayo inahifadhi dawa hizo na kuzisambaza iliyopo eneo la Mwenge jijini.

Moto huo ambao chanzo chake bado hakijajulikana ulianza kuteketeza vifaa hivyo  jana saa 3 asubuhi katika bohari hiyo.

Meneja Operesheni wa Bohari hiyo, Naftal Philip aliwaambia waandishi wa habari kwamba vifaa na dawa  vyote vilivyokuwa kwenye ghala vimeteketea na hakuna kilichobaki.

Alisema baada ya kutokea kwa moto walifanya jitihada za kutafuta vikosi vya uokoaji, lakini kikosi cha zimamoto cha jiji kiliwahi katika tukio dakika 20 baada ya kupewa taarifa.

“Moto huu umeteketeza kila kitu kilichomo humu ndani na kuna dawa zingine zimekuja jana tu hapa,” alisema Philip.

Alibainisha kuwa katika tukio hilo hakuna madhara yoyote kwa binadamu na kwamba bado wanaendelea kufanya tathmini ili kubaini  chanzo cha moto huo ambao umesababisha  hasara.

Kamanda wa Polisi Mkoa wa kipolisi Kinondoni, Charles Kenyela alipoulizwa juu ya tukio hilo, alisema bado taarifa hizo hazijafika ofisini kwake na kwamba apigiwe baada ya nusu saa.

“Bado sijapata taarifa hizo, naomba unipigie baada ya nusu saa nadhani nitakuwa nimepata taarifa,” alisema Kamanda Kenyela.

Ofisa wa Kikosi cha Uokoaji cha jiji, Sanjeti Meja Kulwa Nzelekela aliwaambia waandishi wa habari  kwamba  chanzo cha moto huo inasemekana ni hitilafu ya umeme  iliyotokea katika ghala hilo.

“Tulifika eneo la tukio dakika 20 baada ya kupigiwa simu na tulienda pale na magari manne, na kampuni hiyo (Pyramid Pharm) waliamua kutuongezea nguvu kwa kuwa na magari binafsi ya kusambaza maji ili kutujazia maji kupunguza usumbufu wa kwenda na kurudi kufuata maji,” alisema Meja Nzelekela.