Waziri aduwazwa na rundo la 'pampers' kiwanda cha Urafiki

Waziri wa Viwanda, Biashara na Uwekezaji, Charles Mwijage

 

 Waziri wa Viwanda, Biashara na Uwekezaji, Charles Mwijage, ametembelea kiwanda cha nguo cha Urafiki jijini Dar es Salaam na kukuta baadhi ya maghala ya kiwanda hicho yamehifadhi sababuni za kufulia na kuogea, kandambili aina ya bata, mafuta ya kupaka, blueband, pampers, spea za pikipiki, samani za nyumbani     na   vinjwaji baridi vya kopo.

 

Mbali ya hivyo, Waziri Mwijage pia alikuta baadhi ya maghala yaliyokuwa na mashine za kiwanda hicho kuwa tupu na kugundulika kuwa mashine hizo zaidi ya 4,000  zimeuzwa kama chuma chakavu.

 

Waziri pia alibaini mtambo ambao ulikuwa ukitengeneza kombati za Jeshi la Wananchi wa Tanzania (JWTZ) pia ukiwa umeng’olewa na kupelekwa kusikojulikana.

 

Alibaini madudu mengine katika chumba cha mashine za kuchambulia pamba chafu na safi, sehemu ambazo nyuzi chafu huchambuliwa na sehemu ya kukamilisha nyuzi kwa ajili ya maandalizi ya kutengeneza nguo (spining), mashine zote 134 zikiwa hazifanyi kazi.

 

 

Katika ziara hiyo, waziri alibaini mashine zaidi ya 4,000 zikiwa hazitumiki kwa madai ni mbovu, lakini baada ya kuuliza mhusika, alisema nzima na zina uwezo wa kufanya kazi.

 

Tatizo lingine alilolikuta ni kutokuwapo kwa mawasiliano yenye tija kati ya menejimenti na wafanyakazi kiwandani hapo.

 

Kufuatia hali hiyo, Waziri Mwijage aliahidi kuitisha kikao na uongozi huo ili kubaini matatizo zaidi ya kiwanda hicho.

 

Aidha, ameuagiza uongozi wa kiwanda kurejesha haraka mashine na mitambo iliyong’olewa na kuuzwa kwa wafanyabishara ili kurejesha heshima na hadhi ya kiwanda hicho kikubwa cha nguo kuliko vyote nchini.

 

“Ninauagiza uongozi wa kiwanda kusitisha mara moja mikataba na wahusika waliokodisha maghala haya, pia kiwanda kianze kuzalisha bidhaa za jinja zaidi ili kuendana na mahitaji ya Watanzania,” alisema Waziri Mwijage na kuongeza:

 

“Kama mashine zipo za kutosha, watu wapo na umeme upo, muajiri wafanyakazi 3,000 tofauti na 850 waliopo sasa ili kiwanda kizalishe malighafi nyingi zaidi na kufanya kazi kwa zamu tatu badala moja ya sasa.”

 

Kadhalika, uliutaka uongozi huo kufanya kazi kwa bidii na kuwa na maelewano na wafanyakazi wao kwa kuwasikiliza na kutatua matatizo madogo madogo ili kiwanda hicho kiendelee.

 

Hata hivyo, Meneja wa kiwanda hicho, Nassoro Baraza na Naibu Meneja wake, Moses Swai, hawakuwapo kufuatia kusimamishwa na serikali kutokana na tuhuma mbalimbali zinawakabili zinazohusu ubadhirifu wa mali za kiwanda.