Leo ni Uhuru na Kazi nchi nzima

Katibu Mkuu wa Ofisi ya Waziri Mkuu Tawala za Mikoa na Serikali za Mitaa (Tamisemi), Jumanne Sagini, akizungumza na waandishi wa habari, Dar es Salaam leo.

KATIBU Mkuu Ofisi ya Waziri Mkuu (TAMISEMI), Jumanne Sagini amewaagiza viongozi wa ngazi zote walio chini yake, kusimamia kikamilifu agizo la Rais linalowataka wananchi wote wanashiriki kufanya usafi wa mazingira leo, kama njia ya kuadhimisha maadhimisho ya sikukuu ya Uhuru.

Pia, amewataka kuhakikisha kwamba kuanzia Desemba 15, mwaka huu, wanamtumia taarifa za mwendelezo wa utekelezaji wa shughuli za usafi wa mazingira za maeneo yao kila baada ya wiki mbili ili kuwa na usafi endelevu. Alitoa agizo hilo jana wakati akitoa taarifa kuhusu utekelezaji wa maelekezo ya Rais John Magufuli kuhusu maadhimisho ya Sikukuu ya Uhuru, inayoadhimishwa leo kote nchini.

Dk Magufuli ameamuru sikukuu ya leo itumiwe na wananchi kufanya usafi katika maeneo yao ya makazi, maeneo ya ofisi na maeneo ya mikusanyiko ili kudhibiti ugonjwa wa kipindupindu. Tangu Uhuru, sherehe hizo zilikuwa zinaadhimishwa kwa gwaride ambalo liliandaliwa na Jeshi na kutoa nafasi kwa Amiri Jeshi Mkuu kukagua gwaride hilo. Hatua hiyo ya Rais Magufuli imeokoa kiasi cha Sh bilioni nne, ambazo ameamuru ziende kutumika kupanua barabara ya kutoka Mwenge hadi Morocco ili kupunguza msongamano wa magari katika barabara hiyo.

Sagini alisema leo itakuwa siku ya mapumziko kama ilivyozoeleka, lakini hapatakuwa na gwaride badala yake Watanzania wote watalazimika kufanya usafi wa mazingira kuanzia asubuhi hadi saa 7 mchana. “Utekelezaji wa agizo hili unamhusu kila Mtanzania bila kujali itikadi zao za kiimani au kisiasa,” alisema. Pia aliwaomba wenye malori kushirikiana na wananchi kwa kubeba uchafu huo kutokana na magari yaliyopo yanayotumiwa na halmashauri mbalimbali kutotosheleza.

Hata hivyo, alisema agizo hilo haliwahusu mabalozi wanaoziwakilisha nchi zao hapa nchini ambao walikuwa wanaalikwa kwenye sherehe za Uhuru kushuhudia gwaride la Jeshi. “Mabalozi hawabanwi na agizo hili ila kama kuna balozi ambaye anapenda kushirikiana na jirani zake kufanya usafi hakatazwi,” alisema. Katibu Mkuu huyo aliwataka viongozi wote katika mamlaka za Tamisemi kuhakikisha kuwa sera, sheria na kanuni mbalimbali zilizopo zinasimamiwa na kutekelezwa katika maeneo yao ili kupunguza uchafuzi wa mazingira.

“Ni matumaini ya serikali endapo sheria, kanuni na taratibu zinasimamiwa ipasavyo Suala la uchafu na uharibifu wa mazingira litakoma,” alisema na kuongeza kuwa licha ya kuwepo sheria na sheria ndogo za kusimamia usafi bado watu wanaendelea kuchafua mazingira.

Kwa upande wake, Katibu Mkuu wa Ofisi ya Rais, Menejimenti ya Utumishi wa Umma, Hab Mkwizu alisema leo ni siku ya mapumziko, na kwamba kutokana na maagizo ya Rais Magufuli, watumishi wa umma wanatakiwa kuitumia siku ya leo kufanya kazi za usafi kule wanakoishi, na kazi hizo zitafanyika kwa kufuata taratibu zilizoandaliwa na kuelekezwa na viongozi wa Mamlaka za Serikali za Mitaa katika maeneo husika.

Naye Rais mstaafu Jakaya Kikwete leo atashirikiana na wananchi wa Chalinze, kufanya usafi katika maeneo mbalimbali ya mji huo; kwa mujibu wa Mkuu wa Mkoa wa Pwani, Evarist Ndikilo. Ndikilo alisema kuanzia sasa kila Jumamosi ya kwanza ya kila mwezi, itatumika kufanya usafi katika maeneo mbalimbali ya mkoa huo huku watendaji wa mitaa, maofisa tarafa, mabibi afya, mabwana afya wakitakiwa kusimamia usafi huo.

“Mikakati tuliyonayo ni pamoja na kukubaliana kufanya usafi kila Jumamosi ya kwanza ya kila mwezi, wenye mabasi yote yanayotoka jijini Dar es Salaam kwenda mikoani kupitia barabara ya kuu ya Morogoro kuweka vifaa vya kutupia taka ndani ya mabasi yao na kuendelea kutoa elimu ya usafi wa mazingira kwa jamii,” alisema Ndikilo. Aidha, Jumuiya ya Chuo Kikuu cha Dar es Salaam imewahimiza wanajumuiya wake wote kuwa leo ni siku ya kazi kama kawaida na itatumika kufanya usafi, hivyo kila mwanajumuiya anatakiwa kuwa eneo la usafi alilopangiwa.

Kwa mujibu wa taarifa kwa vyombo vya habari iliyotolewa jana na Makamu Mkuu wa Chuo hicho, Profesa Rwekaza Mukandala, mpango huo wa usafi unaratibiwa na yeye kwa kushirikiana na watendaji walio chini yake. Wakati huo huo, Rais Magufuli amewahakikishia Watanzania kuwa serikali yake itafanya kila lililo ndani ya uwezo wake kuhakikisha kwamba Uhuru, Amani na Umoja na wa Taifa, hauchezewi na mtu, kikundi au Taifa lolote.

Rais Dk Magufuli alisema hayo katika salamu zake za maadhimisho ya miaka 54 ya Uhuru wa Tanzania Bara, ambao unaadhimishwa leo nchini kote kwa wananchi kufanya usafi katika maeneo yao kama alivyoelekeza. “Napenda kuwahakikishia kwamba, kama ilivyokuwa kwa Serikali za awamu zilizopita, Serikali ya Awamu ya Tano itafanya kila lililo ndani ya uwezo wake kuhakikisha kwamba Uhuru, Amani na Umoja na wa Taifa letu hauchezewi na mtu, kikundi au Taifa lolote,” alisema Rais Magufuli.

Aidha, Rais Magufuli alisema “Tutaendelea kudumisha Uhuru wetu na Mapinduzi ya Zanzibar, tunu ambazo ni msingi wa Muungano wetu na Utanzania wetu.” Tofauti na ilivyozoeleka, mwaka huu shereke za kumbukumbu ya miaka 54 ya Uhuru zitafanyika kwa kufanya kazi, huku Rais akisema wakati nchi inapata Uhuru, Taifa lilikuwa likiongozwa na kaulimbiu ya ‘Uhuru na Kazi.’

“Watanzania katika miaka ile waliitikia wito huo kwa kufanya kazi za kuwaongezea kipato na za kujitolea katika kuunga mkono juhudi za Serikali za kuwaletea maendeleo. Katika miaka ya hivi karibuni moyo na uzalendo wa kufanya kazi miongoni mwetu umepungua sana. “Kwa sababu hiyo, niliamua kutumia siku ya kumbukumbu za Uhuru wetu mwaka huu kukumbushana na kutekeleza kwa vitendo kaulimbiu ya Uhuru na Kazi kwa kufanya kazi hususan ya usafi wa mazingira,” alisema Dk Magufuli.

Alisema madhimisho ya miaka 55 ya Uhuru mwakani, yatasherehekewa kama kawaida na mwaka huu alifanya hivyo kwa lengo la kuamsha moyo na uzalendo wa kufanya kazi miongoni mwa Watanzania kwa kutambua kuwa Uhuru wetu hautakuwa na maana, kama hatutafanya kazi kwa juhudi na maarifa ili kujenga Taifa linalojitegemea. Rais pia aliwapongeza viongozi wa mikoa na wilaya na wa taasisi za umma na binafsi na mashirika yasiyo ya kiserikali, yaliyojitokeza katika kuhakikisha kuwa kazi ya usafi wa mazingira inafanikiwa.

Aidha, alitoa mwito kwa halmashauri zote nchini, kuhakikisha zinaweka mifumo na taratibu thabiti zitakazowezesha usafi wa miji kuwa endelevu. “Viongozi wa Mikoa, Wilaya na Halmashauri waache visingizio, uwezo na mamlaka ya kuhakikisha kwamba usafi katika miji yao unadumishwa wanao. Uwezo wa utendaji wao utapimwa pia kutokana na hali ya usafi wa miji yao,” aliongeza Rais Magufuli.

Rais aliwaomba wananchi kuhakikisha kuwa nyumba na mazingira ya nyumba zao, yanakuwa safi na maji ya kunywa katika maeneo ambayo hayawekwi dawa yanachemshwa. Aidha, wananchi wajizuie kutupa taka ovyo na viongozi wa Serikali za Mitaa, vijiji na vitongoji, wahakikishe kwamba kila nyumba inakuwa na choo ili kuhakikisha vita dhidi ya maradhi kama kipindupindu inafanikiwa, ikiwa wote watazingatia kanuni za afya na kutaka kila mtu atimize wajibu wake. Imeandikwa na Shadrack Sagati, Mroki Mroki, Dar, Anna Makange, Tanga na John Gagarini, Kibaha.