Wazee waitaka serikali kutochanganya siku ya kumbukumbu ya kumuenzi mwalimu nyerere na uzimaji wa mwenge.

Wazee  nchini   wameiitaka serikali  kuchukua hatua   za  kutofautisha  siku  ya  sherehe  ya uzimaji   wa mwenge   wa uhuru  na  kumbukumbu  ya kumuenzi  baba  wa  taifa  hayati  mwalimu  Julius  Kambarage Nyerere  ili  kuongeza uzito  zaidi  katika  siku  hiyo   muhimu   ya  kumuenzi  muasisi  huyo  wa  taifa  la Tanzania.

 

Wakizungumza  katika  kongamano  maalum  la  maadhimisho   ya  miaka  15 ya  kifo  cha  baba   wa taifa hayati  mwalimu  Julius  Nyerere ambalo limefanyika  eneo  la  mwitongo   kijijini   Butiama  mkoani  mara, wawakilishi    wa  wazee  hao  kutoka  mikoa  ya  tanzania  bara   na  visiwani,wamesema  hakuna  sababu ya  kuchanganya siku  hiyo  muhimu   ya  kumkumbuka  muasisi    wa  taifa  la  tanzania  na  shughuli   za uzimaji   wa  mwenge  wa uhuru.

 

Hata  hivyo   wazee  hao  wameonesha  kuchukizwa  na baadhi  ya  viongozi   wanaoshindwa kumuenzi  mwalimu  nyerere  kwa kuchukizwa  na  vitendo  vya  rushwa,ukiukwaji  mkubwa   wa  maadili  na  miiko   ya  uongozi  kwa  kusema   kuwa  viongozi  wengi   wamekuwa  na  tabia  ya  ubinafsi   na  kujilimbikizia   mali   huku   wakiwasahau  watu  wanaowangoza.

 

 akizungumza  baada  ya  wazee  hao  kutoa tamko  hilo,mmoja  watoto wa baba  wa  taifa  Mh.Makongoro Nyerere, amesema wakati   watanzania  wakiadhimisha  miaka 15  bila  mwalimu, kuna  haja  kwa taifa  kuandaa  taratibu   za  kisheria   zitakazosimamia  maadili  na  miiko    ya  uongozi  ili  kuwabana  wahusika badala   ya   sasa   viongozi   wengi   wamekuwa wakitumia   majukwaa  ya  kisiasa  kwa  kudai  kumuenzi   kiongozi huyo. 

 

Wazee  hao  pia  wamepata fursa  ya  kuweka mashada  ya  maua  katika kaburi   la  baba  wa  taifa  na  kuungana na  wakazi   wa  butiama  wakiongozwa  na  familia   na  baadhi   ya  viongozi   wa  mkoa  wa  mkoa wa mara   kushiriki   katika  misa  maalum   ya   kumuombea  baba  wa  taifa  hayati   mwalimu  julius  nyerere  kisha  kupanda miti  katika  msitu   wa muhunda   katika  eneo   la  mwitongo.