Mkurugenzi Bodi ya Kahawa avamiwa, aibiwa gari

Moshi. Watu wasiojulikana wamevamia nyumba ya Mkurugenzi Mkuu wa Bodi ya Kahawa (TCB), Adolf Kumburu iliyopo Shanty Town, mjini Moshi na kuiba vitu mbalimbali vyenye thamani ya mamilioni ya shilingi likiwamo gari.

Wezi hao walifanikisha dhamira yao baada kumteka mfanyakazi wa ndani na kisha kumfunga kamba mikononi na vitambaa usoni. Gari lililoibwa ni Toyota Raum namba T643 CDZ rangi ya Bluu.

Kamanda wa Polisi Mkoa wa Kilimanjaro, Robert Boaz alithibitisha jana kutokea kwa tukio lililofanywa kati ya saa 6.00 na saa 7.00 mchana.

“Ni kweli, tukio limetokea na miongoni mwa vitu vilivyoibwa ni gari. Mpaka sasa hakuna mtu yeyote aliyekamatwa na tunaendelea na uchunguzi,” alisema Kamanda Boaz.

Kamanda Boaz ametoa wito kwa wananchi wenye taarifa zitakazofanikisha kukamatwa kwa watuhumiwa hao pamoja na vitu vilivyoibwa waziwasilishe kwa siri kwake ama kwa maofisa wake na majina yatahifadhiwa.

Akizungumza na gazeti hili jana, Kumburu alisema wezi hao walifanikiwa kuiba vitu mbalimbali na kuvipakia katika gari lake.

Mbali na gari hilo, pia televisheni aina ya Samsung Flat Screen, Deck aina ya Phillips, Micro-Wave, kompyuta mpakato aina ya Apple Mac Book, Samsung Min-Tablet na Digital kamera mbili pia viliibwa.

Kwa mujibu wa Kumburu, wezi hao huenda walitumia mazingira ya ukimya katika eneo hilo la Shanty Town kutekeleza uhalifu wao bila majirani kufahamu.