Nukuu za Mwalimu

  Nchi changa ni sawasawa na nyumba mpya

“Nchi yetu ni kama nyumba mpya. Nchi change sawa sawa na nyumba mpya. Mmeijenga vizuri mmetayarisha msingi, mkaijenga mkaimaliza. Mnafurahi. Ndipo mnaridhika nyumba imara, inapendeza. Lakini haijasukumwa. Haijatikiswa. Mara unatokea mtikisiko, ile nyumba inatikiswa. “ Ule mtikisiko utawaonyesheni sehemu mbovu za nyumba ile. Ilikuwa kwanza mnaiona yote ni nzuri, inapendeza. Lakini, kama unakuja msukumo wa mtikisiko wa kutosha kabisa, sasa ndipo mtakapoanza kuona maeneo mabovu ya nyumba ile na kutokea nyufa. Nyingine ndogo katika paa, kama ilikuwa ni nyumba imara, nyufa nyingine  ndogo zaidi katika paa, nyingine katika dari, hata linta lililokuwako huenda likaanguka chini. “Lakini, kama mtikisiko ulikuwa mkubwa, mnaweza kukuta nyufa hata katika msingi: hata msingi wenyewe nao umepata nyufa! Sasa, mtakachotaka baada ya hapo, baada ya kuona hivyo, mambo mawili yanaweza kutokea. La kwanza ni kwamba ule mtikisiko utakwisha: hautakuwapo. “ Sasa baada ya hapo mtafanya nini? Mtaziba zile nyufa: mtaziba. Mtaziona sehemu mbovu: mtaziba vizuri sana. Kama zilikuwapo katika paa mtaziba kwenye dari, mtaziba mtatengeneza vizuri. Eh! Zilizoharibika haribika, hizo mtazitengeneza vizuri; zilikuwapo nyufa katika msingi, mtatengeneza sana, hasa zile katika msingi. Maana zile ndizo muhimu sana. “Na nyumba baada ya hapo itakuwa imara sana. Ilikuwa haijapata mtikisiko ninyi mlidhani ni imara, lakini ilikuwa haijapata mtikisiko. Sasa imepata mtikisiko mmeziona zile nyufa zake. Zile sehemu mbovu mbovu zake mmeziona, sasa; mkizitengeneza, nyumba itakuwa imara. Ikiwa mtikisiko umekwisha, mtapata nafasi ya kutengeneza. “Linaloweza kutokea jingine ni kwamba mtikisiko ule utaendelea. Ukiendelea, itabomoka. Hata ingekuwa imara kiasi gani, itawabomokeeni madhali imekwisha kuonyesha, hata katika msingi, kuna nyufa. Kama tikisiko lile likiendelea, itabomoka. Ndivyo ilivyofanyika Kobe juzi juzi Ujapani. Lile halikumalizika. Kama lingepita mara moja tu, ‘vupu’ Kobe isingalikwisha. Lakini liliendelea, yakaanguka majumba mengi sana . Mwalimu J.K. Nyerere; Nyufa (1995)