UNBOUNDARIES NEWS

 Sumu haionjwi, ukionja unakufa

HIVI karibuni baadhi ya wabunge wa chama tawala waliwakejeli wataalamu na wadau wa elimu waliowakilishwa na Mwenyekiti wa NCCR-Mageuzi na mbunge wa kuteuliwa, James Mbatia, hatimaye serikali ‘ikaioga’ aibu.

Kama kuna jambo lililoniudhi basi ni la washauri wa Rais Jakaya Kikwete kuwa bubu huku wakiruhusu hoja potofu za wabunge wake kuikejeli hoja ya Mbatia kuhusu udhaifu wa elimu, kiasi cha kutuaibisha.

Katika Bunge lililomalizika hivi karibuni Dodoma, Mbatia aliwasilisha hoja binafsi akichambua udhaifu wa mfumo wa elimu nchini na kutaka Bunge liunde kamati teule kuchunguza hali hiyo na kuja na majibu ya kuboresha udhaifu huo.

Lakini baadhi ya wabunge wa CCM waliizima kwa kejeli.

Mtaalamu mmoja Msukuma wa sumu na mchezea nyoka anasema: “Sumu haionjwi na ukiionja lazima unakufa.”

Katika hoja hiyo Mbatia alienda mbali zaidi kwa kusema serikali haina mitaala ya elimu wala haijawahi kuwa nayo, jambo lililoibua mjadala mzito bungeni hadi kusababisha wabunge wa kambi ya upinzani kutoka ukumbini.

Kutokana na wingi wa wabunge wa CCM bungeni, wingi ambao una hasara  na faida, waliizima hoja ya Mbatia kwa kejeli huku viongozi wanaomshauri rais na Bunge kutoka sekta mbalimbali wakifumbwa macho na ibilisi, wakaonja sumu.

Wadau wanaojua weledi na miiko ya elimu wanasema: “Kama ukiona elimu ni gharama basi jaribu kuwa mjinga, utaona adha yake.”

Baba wa Taifa hayati Mwalimu Nyerere alionya na kusema: “Mficha maradhi kifo kitamfichua.”

Ingawa siamini kama katika Bunge letu kuna mbunge mwenye elimu ya darasa la saba ambaye tungesema aliona elimu ni gharama, lakini naamini wapo wabunge na viongozi wa kitaifa wanaopenda kuficha ukweli na kusema uongo ambao wametusababishia kifo cha elimu.

Kwa mtazamo wangu washauri wa rais walistahili kushauri kwamba sumu haionjwi na ikionjwa mtu lazima afe na si utani kama wanavyodhani kuwa wanawakomoa wapinzani, wajue wanawaua walalahoi.

Katika hili niseme kitendo cha kuwapuuza walimu wa kada zote na  kuwakejeli kwa kutowathamini na kuwaona hawana maana, ijapokuwa pengine nao wana udhaifu wao, ni sawa na kuonja sumu ambayo tunajua fika kuwa haionjwi, sasa tumeonja imetupatia kifo cha elimu.

Kwa mtazamo wangu kejeli za wabunge wa CCM ndizo zimemsababishia Mbatia kukataa uteuzi wa Waziri Mkuu Mizengo Pinda ambaye alimtangaza kuwa mmoja wa wajumbe walioteuliwa kuchunguza kiini cha kufeli kwa wanafunzi wa kidato cha nne.

Katika taarifa yake kwa vyombo vya habari, Mbatia anasema amegomea uteuzi huo kwa sababu tatu.

Mosi, ni kwamba hajapata barua rasmi ya uteuzi, lakini pia ana hoja bungeni ambayo haijafika mwisho na tatu haiungi mkono tume hiyo.

“Napenda nitoe taarifa kwamba mpaka leo sijapokea taarifa zozote kwa maandishi kutoka ofisi ya Waziri Mkuu zinazothibitisha mimi kuteuliwa huko,” alisema Mbatia, na namuunga mkono maana kama angekuwa wa maana angekubaliwa hoja yake badala ya kuikejeli.

Ni rai yangu kwa wabunge wa CCM kwamba wafike mahali wasitafutiwe mawazo na kufundishwa hoja za vikao na badala yake wajenge hoja zao ili kuwasaidia wapiga kura wanaoteseka na kero zisizoisha huku wakiminywa kodi yao.

Aibu hii imetusababisha tuonje sumu ingawa kwa maonyo, sumu haionjwi, na ikionjwa mtu anakufa