Watalii mlima Kilimanjaro wapungua kwa miaka mitatu mfululizo.

Idadi ya watalii wanaopanda mlima Kilimanjaro kutoka nje ya nchi  Mwaka huu imepungua kwa asilimia kumi kutokana na uwepo wa tishio la matukio ya  ugaidi katika nchi za Afrika Mashariki,na ugonjwa wa Ebola hali ambayo inaathiri  upatikanaji wa mapato yatokanayo na mlima.

Hayo yamebainishwa na mhifadhi mkuu wa mlima Kilimanjaro Bw.Erastus Lufungulo wakati akipokea  msafara wa maafisa 39 wa jeshi la Magereza nchini ambao walipanda mlima huo mrefu kuliko yote barani Afrika wenye mita 5895 kutoka usawa wa bahari  kwa ajili ya kuhamasisha utalii wa ndani.

 

Amesema  wageni wengi kutoka nje ya nchi wamesitisha  ziara za kutembelea hifadhi hiyo ikilinganishwa na miaka  iliyopita na kwamba tafiti zimeonyesha pia uchaguzi mkuu uliofanyika mwezi Oktoba  Mwaka huu  umechangia kwa kiasi kikubwa kukosa watalii kutokana na wengi wao kuhofia uwepo wa vurugu.

 

Kwa upande wake mwenyekiti wa klabu ya utalii wa jeshi la Magereza nchini Bw.Estomii Hamis amesema safari ya kupanda mlima Kilimanjaro ilikuwa ngumu na kwamba kati ya maafisa 39 waliopanda mlima ambao wamefanikiwa kufika katika kilele cha mlima huo kituo cha uhuru ni 25 pekee.

 

Nao baadhi ya maafisa wa jeshi  la Magereza waliofanikiwa kufika katika kilele cha mlima Kilimanjaro wamewataka watanzania  kujenga tabia kuthamini vivutio vya utalii vilivyopo nchini na kuvitembelea ili kuchangia pato la taifa kupitia utalii wa ndani.