Ripoti ya UNFPA inaonyesha kuwa Tanzania inaongoza kwa tatizo la mimba za utotoni.

Kufuatia ripoti ya shirika la umoja wa mataifa la idadi ya watu ( UNFPA ) ya mwaka 2013 kuitaja Tanzania kama moja ya nchi zilizokithiri kwa tatizo la mimba za utotoni, serikali mkoani Mwanza imewataka wazazi kuacha kuwa mawakala wa ndoa za utotoni,wala kukubali kufanya mazungumzo na wabakaji au baadhi ya wanaume wanaowapa mimba watoto wa kike nje ya utaratibu wa mahakama au vyombo vingine vya dola.

Mkuu wa mkoa wa Mwanza Magessa Mulongo ameyasema hayo katika hotuba iliyosomwa kwa niaba yake na mkuu wa wilaya ya ilemela Manju Msambya wakati wa kilele cha maadhimisho ya siku 16 za kupinga ukatili wa kijinsia, zilizoratibiwa na chama cha wanasheria wanawake Tanzania ( TAWLA ) na kufanyika katika uwanja wa furahisha jijini Mwanza, ambapo ameliagiza jeshi la polisi kuhakikisha kesi zinazohusu vitendo vya ukatili wa kijinsia haziishii tu polisi bali zinapelekwa Mahakamani ili haki iweze kupatikana.

Akizungumza wakati wa kilele cha maadhimisho hayo amesema makundi ya waathirika wa mifumo kandamizi yakiwemo wanawake na watoto katika nchi nyingi za bara la Afrika zenye migogoro ya kisiasa na kivita wamenyimwa haki ya elimu na wengine kuishia kutumikishwa vitani,ambapo ametumia fursa hiyo kuwahimiza viongozi wenzake, watawala,viongozi wa kisiasa,viongozi wa dini na jamii kwa ujumla kusimama kidete kupinga vitendo vya ukatili wa kijinsia. 

Makamu mwenyekiti wa chama cha wanasheria wanawake Tanzania Margareth Ngasani pamoja na wakili Costantine Mutalemwa kutoka chama cha mawakili wa kujitegemea tanganyika tawi la Mwanza wamekemea matukio ya ubakaji, ulawiti na vipigo visivyokubalika kwani vimechangia kurudisha nyuma maendeleo ya kielimu kwa watoto wa kike.