Mh. Mwamunyange: Tunafanya usafi mwaka mzima

AGIZO la Rais na Amiri Jeshi mkuu Mh. Dkt. John Magufuli la kutaka Sikukuu ya Uhuru kuadhimishwa kwa kufanya usafi,  limetekelezwa kwa kasi kubwa katika maeneo mbalimbali nchini.

Huku viongozi wa serikali, na baadhi ya taasisi na watu binafsi, wamejitolea kufanya usafi katika maeneo yao ya kazi na maeneo mengine yanayowazunguka.

Juzi eneo la Kipunguni, wananchi wa maeneo hayo walijitokeza kufanya usafi wa mazingira kwa kufyeka miti na kulima nyasi pamoja na kuhakikisha wanazibua mifereji ya majitaka.

Jana pia Mkuu wa Mkoa wa Mwanza, Magesa Mulongo alishiriki kufanya usafi wa Jiji la Mwanza kwa kushirikiana na wafanyabiashara wa soko kuu, ambako alitumia fursa hiyo pia kuwataka walipe kodi sahihi kwa serikali.

Mjini Songea, wafanyabiashara wa samaki katika soko kuu la Manispaa ya Songea mkoani Ruvuma, wametakiwa kufanya biashara zao za kuzingatia usafi ili kuendelea kuvutia wateja wao kununua kitoweo hicho.

Mwito huo ulitolewa jana na Mkuu wa Masoko wa Manispaa hiyo, Salum Homela alipokuwa akikabidhi vifaa vya usafi kwa wafanyabiashara wa soko hilo ili wavitumie kwa ajili ya kufanya usafi wa mazingira kuzunguka maeneo wanayofanyia shughuli zao ikiwa ni utekelezaji wa agizola Rais John Magufuli.

Homela alisema usafi kwa wafanyabiashara ni jambo la muhimu kwani itasaidia kuepusha watumiaji wa bidhaa zao uwezekano wa kupata magonjwa, yanaosababishwa na uchafu, ikiwemo ugonjwa hatari wa kipindupindu.

Alisema kuna umuhimu kwa wafanya biashara wote wakiwemo wale wa matunda, nyama, na bidhaa nyingine sokoni hapo kuzingatia usafi kwa kuwa watu wengi hasa wageni wanaotembelea manispaa hiyo, jambo la kwanza wanalohitaji kuona ni namna ya wakazi wa Songea walivyoweza kuzingatia suala la usafi wa mazingira katika maeneo muhimu yanayotoa huduma mbalimbali za kijamii. 

Aidha naye mkuu wa mkuoa wa Ruvuma ameongeza kwakutoa agizo kali kwa mtu yeyote atakayebainika kuchafua mazingira atatozwa faini ya Tsh. 50,000/= papohapo na iwapo atashindwa kutekeleza hilo atakwenda Jela.

Kwa upande wao, Jeshi la Ulinzi la Wananchi wa Tanzania (JWTZ), limeshirikiana kikamilifu na wananchi kufanya usafi katika maeneo mbalimbali, ikiwa ni sehemu ya maadhimisho ya Sikukuu ya Uhuru Desemba 9.

Mkurugenzi wa Habari na Mahusiano wa JWTZ, Kanali Ngemela Lubinga alisema jana kuwa usafi ni utekelezaji wa agizo la Rais John Magufuli. “Mwaka huu, Serikali imeamua kubadilisha utaratibu wake wa kawaida na shamrashamra za gwaride badala yake imeagiza kufanyika kwa usafi nchi nzima” alisema Kanali Lubinga.

Alisema, “Usafi kwa sisi wanajeshi siyo jambo la kufundishwa, ni jadi yetu na ni tabia yetu siku zote kwa hiyo kwa kuwa kambi zetu ni safi kila siku tutaungana na wananchi wote kufanya usafi katika maeneo mbalimbali nchini.”

Kutokana na agizo hilo la Rais, taasisi na mashirika mbalimbali yamekuwa yakijitokeza kushiriki juhudi hizo za kufanya usafi wa mazingira, lengo likiwa ni utekelezaji wa agizo hilo na kuepukana na ugonjwa wa kipindupindu.