Madaktari bingwa wa hospitali ya Bugando wametoa huduma za afya bure.

Madaktari bingwa wa hospitali ya rufaa Bugando jijini Mwanza wameendesha zoezi la huduma ya bure ya ushauri wa afya kwa watu wenye magonjwa mbalimbali pamoja na kutoa elimu ya namna ya kujikinga na magonjwa ya milipuko, ukiwemo ugonjwa wa kipindupindu ambao mpaka sasa umesababisha vifo vya watu 21 katika mkoa wa Mwanza na wengine 687 kuugua ugonjwa huo kuanzia mwezi septemba hadi Desemba mwaka huu.

Madaktari bingwa waliojitokeza kushiriki katika zoezi hilo lililofanyikia hospitalini hapo ni wa magonjwa ya saratani, akinamama, watoto, magonjwa ya akili, upasuaji, mfumo wa mkojo, macho, meno, tiba na mfumo wa hewa. 

 

Lengo la zoezi hilo lilikuwa ni kuonyesha umahiri wa huduma za tiba zinazotolewa na hospitali hiyo pamoja na kufanya usafi wa mazingira, ambapo wakazi wa jiji la Mwanza na mikoa jirani wamejitokeza kwa wingi kupata huduma za ushauri wa kiafya.

 

Naye daktari bingwa wa upasuaji mfumo wa mkojo katika hospitali hiyo Dk. John Igenga amesema kuwa wagonjwa wengi wamekuwa na uelewa finyu kuhusu aina ya ugonjwa unaowasumbua, huku daktari bingwa wa upasuaji wa magonjwa ya koo, pua na masikio (ent), ambaye pia ni mkurugenzi wa huduma za hospitali hiyo Prof. Japhet Gilyoma ameridhishwa na mwitiko wa wananchi katika zoezi hilo.