Sheria Chuo Kikuu Dar waweka rekodi mpya

Dar es Salaam.Shule ya Sheria katika Chuo Kikuu Dar es Salaam (UDSM), imeandika historia mpya baada ya kutoa wahitimu 200 katika ngazi ya Shahada ya Uzamili kiwango ambacho ni ongezeko maradufu la idadi ya wahitimu 10 hadi 15 wanaopatikana kila mwaka kwa miaka ya nyuma.

Akizungumza na Mwananchi juzi, Mkuu wa Shule hiyo Profesa Bonaventure Rutinwa alisema idadi hiyo ni sehemu ya utekelezaji wa mipango ya UDSM ambayo imelenga kuwaandaa wahitimu wa ngazi ya shahada ya uzamili na uzamivu na ngazi zingine kuviacha vyuo vingine.

“Nchini kuna vyuo vipatavyo 30 na vyote vimewalenga wahitimu wa ngazi nyingine na siyo hizo mbili, hivyo chuo kimeona ni vyema kikashughulika na wale ambao ni wa ngazi za juu zaidi ili kufanya usiwepo upungufu” alisema.

“Ni haki yetu kujivunia mafanikio haya kwa sababu tunakwenda kutimiza lengo la kutoa elimu kwa wanafunzi wengi katika masomo ya sheria,” alisema.

Profesa Rutinwa alisema kwa shule ya sheria kutoa wahihitimu wa ngazi ya juu wa kiwango hicho ni jambo la kihistoria na wanajivunia hatua hiyo na wamejipanga kuhakikisha idadi hiyo inaongezeka kila mwaka. Hivyo ni wajibu wa wanajamii kusoma kwa bidii ili kuweza kutimiza malengo yao kwani inawezekana.