Karibu Rais Magufuli

UTAMADUNI uliotukuka na kujengwa kwa miaka mingi na Watanzania wa kuishi kwa amani, utulivu, upendo na mshikamano bila kujali tofauti za kidini, kikabila, rangi na itikadi, umedhihirika tena jana kwa Watanzania kushuhudia Dk John Magufuli akiapishwa katika Uwanja wa Uhuru, jijini Dar es Salaam kuwa Rais wa Awamu ya Tano wa Jamhuri ya Muungano wa Tanzania.Hongera na karibu sana Rais Dk Magufuli.

Hakuna ubishi kwamba ulipitia safari ndefu yenye milima na mabonde hadi kufikia hatua hii ya kuwa mfanyakazi nambari moja wa Serikali ya Awamu ya Tano.

Mliowania nafasi hiyo kupitia chama chako, Chama Cha Mapinduzi (CCM) mlikuwa 38 lakini hatimaye wewe ndiye uliyeibuka kuwa mshindi wa kupeperusha bendera ya CCM katika kinyang’anyiro cha kuwania nafasi hiyo na wagombea wengine saba kutoka vyama vya upinzani.

Mkaingia kwenye mchakato wa Tume ya Taifa ya Uchaguzi (NEC) kwa kuteuliwa rasmi kuwania nafasi hiyo, mkaanza kampeni zilizokuwa na ushindani wa hali ya juu kuliko chaguzi nyingine nne za vyama vingi zilizopita.

Kura zikapigwa na hatimaye ukaibuka mshindi, ukakabidhiwa cheti cha ushindi na kuapishwa rasmi kushika wadhifa huo kwa kipindi cha miaka mitano ijayo.

Mambo hayo yote yalifanyika kwa uwazi, umakini na kwa amani na usalama wa hali ya juu kiasi cha sisi kama Watanzania kusikia wenzetu wa nchi mbalimbali waliotuma waangalizi wa uchaguzi wa kimataifa kupitia taasisi na mashirika mbalimbali ya ndani na nje ya Tanzania, wakitumwagia sifa lukuki.

Tumedhihirisha kwa vitendo kwa mara nyingine tena bila kufanya ajizi kwamba Tanzania ni kisiwa cha amani kwa kubadilishana madaraka ya juu kabisa ya kitaifa kwa amani huku viongozi kutoka nchi mbalimbali za Afrika na nje ya bara hili wakishuhudia kwa nderemo na vifijo uwanjani.

Ni utamaduni ambao nchi za wenzetu wanashindwa kuufikia na siyo kwamba hawataki lakini wamekosa namna ya kuujenga na kuuendeleza utamaduni huu mzuri kwa kila taifa lenye kutaka ustawi na haki kwa watu wake wote bila kubaguana.

Kama ulivyozungumza baada ya kuapishwa kwako Rais Magufuli kwamba uchaguzi umekwisha na Watanzania wote kwa ujumla wake wakiwemo washindani wako, na siyo wapinzani wako katika kinyang’anyiro cha urais kwamba sasa turejee katika hali kulijenga taifa letu baada ya kuhitimisha uchaguzi salama. Hiki ndicho kikubwa tunachotarajia.

Kwa rais wetu mstaafu aliyekuachia kijiti cha uongozi, Dk Jakaya Kikwete, Mungu akuzidishie kila la heri katika maisha yako ya kustaafu baada ya kulitumikia taifa hili, kwa umakini wa hali ya juu hadi kufikia kukabidhi jahazi hilo kwa amani na usalama kwa mujibu wa sheria na taratibu zetu tulizojiwekea wenyewe.

Tunajisikia fahari kuona kwamba unaungana na marais wenzako wastaafu wawili, Ali Hassan Mwinyi na Benjamin Mkapa kuwa raia waandamizi wa nchi yetu mliosimamia kwa umakini misingi ya kubadilishana uongozi wa ngazi ya juu wa taifa letu bila mifarakano kwa kufuata sheria na Katiba ya nchi yetu. Mungu Ibariki Tanzania.