Tuzo ya Samatta yafunga mitaa ya Jiji la Dar, atungiwa wimbo maalum

KATIKA kutambua na kuheshimu mchango wa straika, Mbwana Samatta kwa kutwaa Tuzo ya Mchezaji Bora wa Afrika kwa Wachezaji Wanaocheza Ndani, uongozi wa Dar Live kwa kushirikiana na viongozi wa Wilaya ya Temeke umeandaa sherehe ya kumpongeza  staa huyo.

Sherehe hiyo itafanyika Jumanne, Januari 12, 2016 kwenye Uwanja wa Burudani wa Dar Live uliyopo Mbagala-Zakheem kuanzia mida ya 12:00 jioni kwa kiingilio kiduchu cha Tshs 5,000/=.

Samatta juzi aliandikisha rekodi ya kuwa mchezaji wa kwanza Ukanda wa Afrika Mashariki na Kati kutwaa Tuzo ya Mchezaji Bora Afrika, alipowabwaga Robert Kidiaba (DR Congo) na Baghdad Bounedjah (Algeria).

Waziri wa Habari, Utamaduni, Wasanii na Michezo, Nape Nnauye (kushoto mwenye tuzo) akiwa na Mbwana Samatta.

Meneja wa Dar Live, Juma Mbizo ameliambia Championi Jumatatu kuwa wameratibu sherehe hiyo kwa kuwa Samatta ni ‘mtoto wa nyumbani’ ambako alizaliwa, kukulia na kusomea Mbagala, hivyo kulikuwa na kila sababu ya kumpongeza kwa heshima aliyowaletea.

“Tulikuwa na kila sababu ya kumuandalia sherehe. Amezaliwa, amekulia, amesomea, amechezea na familia yake yote iko Mbagala, hivyo lazima tumthamini. Lakini pia mashabiki watapa nafasi ya kupiga na tuzo hiyo pamoja na yeye,” alisema Mbizo.

Aliongeza sherehe hiyo itanogeshwa kwa burudani kutoka kwa  Juma Nature, Bendi ya Twanga Pepeta, Msaga Sumu pamoja na Khalid Chokoraa ambaye atamtungia single yake ‘special’ kumpongeza kwa tuzo hiyo.

Pamoja na yote, pia viongozi wa Simba na Africa Lyon wamealikwa kwa mchango wao ambako Samatta alipata kuchezea kabla ya kutimkia Mazembe ambako ametwaa ubingwa wa Ligi ya Mabingwa Afrika mbali na tuzo binafsi.

“Naomba watu wajitokeze kwa wingi kuonesha sote tuko pamoja na safari yake ya soka,” aliongeza Mbizo

 

 

Mwanasoka Bora wa Afrika, Mtanzania,  Mbwana Samatta akikatisha katika jiji la Dar leo kuanzia Hoteli ya Hyatt Regency Kempinsk mpaka Escape One akiwa katika gari la waziri wa Habari, Utamaduni, Wasanii na Michezo, Nape Nnauye.

 

…Akiendelea kuwasalimia wakazi wa jiji la Dar.

 

Madereva bodaboda walikuwa kivutio wakimsindikiza Samatta.

 

…Akiendelea kuwasalimia wananchi mbalimbali.

 Waziri wa Habari, Utamaduni, Wasanii na Michezo, Nape Nnauye akiongea na wanahabari.

 

Nape Nnauye akiongozana na Mbwana Samatta kuingia Ukumbi wa Escape One Mikocheni jijini Dar.

Makamu wa Rais wa Simba Geofrey Kaburu(kulia) akisalimiana na Samatta.

 

Samatta akiwa na marafiki zake katika Ukumbi wa Escape One.

Mchezaji Bora Afrika, Mbwana Samatta leo alizunguuka mitaa ya jiji la Dar kuanzia Hoteli ya Hyatt Regency Kempinsk kupitia samora, shule ya uhuru pale karume msafara ukapinda kawawa road mpaka Morocco ulipopinda tena Alli Hassan Mwinyi, mpaka njia panda ya Kawe Pale Lugalo na kuelekea Old Bagamoyo mpaka Escape One ambapo kulikuwa na hafla fupi ya kumpongeza.