UJIO WA OBAMA

Nderemo na furaha zatawala

 

Dar es Salaam. Shangwe, vifijo, vigelegele na ngoma jana vilitawala Uwanja wa Ndege wa Kimataifa wa Julius Nyerere na mitaa kadhaa ya Jiji la Dare s Salaam, wakati maelfu ya Watanzania walipojumuika na Rais Jakaya Kikwete kumpokea Rais wa Marekani, Barack Obama.

Ndege iliyombeba Rais Obama, ijulikanayo kama Air Force One, iligusa ardhi ya Tanzania saa 4:40 asubuhi na Rais Obama alitokea katika mlango wa ndege hiyo mnamo saa 8.43 na kuamsha shangwe na hoihoi kutoka kwa watu waliofika uwanjani hapo.

Alipokanyaga ardhi ya Tanzania, Obama alimkuta mwenyeji wake, Rais Jakaya Kikwete, akiwa tayari kumpokea akiwa ameambatana na mkewe, Mama Salma Kikwete.

Tofauti na ilivyo kwa misafara ya viongozi wengine kutoka nje ya nchi, jana kulikuwa na viongozi wachache sana wa Serikali waliofika uwanjani hapo kumpokea Obama. Walioambatana na Rais Kikwete ni viongozi tisa tu ambao ndiy o walishikana mikono na Rais Obama na mkewe.

Hao ni pamoja na Rais wa Zanzibar, Dk Ali Mohammed Shein, Waziri Mkuu, Mizengo Pinda, Makamu wa Pili wa Rais wa Zanzibar, Balozi Seif Ali Iddi na Waziri wa Mambo ya Nje, Bernard Membe.

Wengine ni Spika wa Baraza la Wawakilishi, Pandu Ameir Kificho, Mkuu wa Mkoa wa Dar es Salaam, Said Meck Sadick na Meya wa Jiji la Dar es Salaam, Didas Masaburi, Mkuu wa Majeshi, Jenerali Davis Mwamunyange na Inspekta Jenerali wa Polisi (IGP) Said Mwema.

Kama ilivyotarajiwa, ulinzi wa uwanjani hapo ulisimamiwa na makachero kutoka Marekani ambao walikagua watu, vifaa na magari yote yaliyowasili uwanjani hapo kwa ajili ya mapokezi hayo.

Hata magari maalumu mawili ambayo Rais Obama aliyatumia pamoja na familia yake walipoondoka uwanjani hapo, yalikaguliwa vikali na askari hao wa Marekani wakiwa na mbwa na vifaa vingine vya kielektroniki kabla hayajaruhusiwa kupaki nje ya uwanja huo na kisha baadaye kuruhusiwa kuingia ndani ya uwanja.

Makachero hao walikagua pia njia ya kurukia ndege kwa kutumia gari lao maalumu walilokuja nalo kutoka Marekani. Mara ya pili walikagua njia hiyo ya kurukia ndege kwa kutumia gari aina ya Noah lililokuwa limewabeba makachero wa Marekani.

Gari hili lilitembea kwenye njia ya kurukia ndege kutoka upande mmoja wa uwanja hadi upande wa pili na kurudi lilikotokea. Wakati fulani, makachero hao waliizuia Land Rover la Polisi ambayo ilionekana kuelekea katika sehemu ya ndege ikielekea au kutoka kwenye njia ya kurukia.

Baada ya kupokewa na mwenyeji wake, Rais Obama na mkewe walikabidhiwa mashada ya maua na watoto kisha Rais Kikwete alimwelekeza mgeni wake kwenye jukwaa maalumu ambako walipigiwa nyimbo za taifa zilizoambatana na mizinga 21.

Baada ya hapo Rais Obama alikagua gwaride lililoandaliwa uwanjani hapo kwa ajili yake kabla gwaride hilo halijapita kwa heshima kwa mwendo wa haraka mbele yake. Kisha Kikwete alimwelekeza Obama vilipokuwa vikundi vya ngoma ambavyo vilitumbuiza. Rais Obama na mkewe walionekana kuvutiwa sana na ngoma hizo, hasa ngoma ya mganda na kuwafanya waanze kutikisa vichwa vyao kulingana na midundo ya ngoma. Rais Obama alishindwa kujizuia na kujikuta akicheza sambamba na wachezaji wengine.